On ki versi piše je rekal: „Na tom svijetu samo mijena jeste“, ma naša ženska nošnja se je u vrime ko se pameti jako malo prominila. Zato se je muška deboto zatrla. Kako i skoro svagdir po svitu, tako se i u nas razlikuju nošnje mladih neoženjenih judi, od nošanj starijih oženjenih. Tako će nas u Kolejani bit malo obučenih u staru mušku nošnju, u belu košuju ka jima dugi široki rukavi zi nabrani ponši, bez koleta, dugu do pedanj spod pasa, i zi leh jednin botunićen ki se zakuči pod vrat. Na tu košuju se nosi črni koret ki ni preširok. Koret je bez rukavi i dug je malo do spod pasa i zakučuje se zi obični botuni. Pleća čovik ogrne zi šarin facolon ki more bit zelen, črjen al kafen. Facol je poprik složen na tri kantuni, z dva vežen sprida u uzal, a treći lipo pada priko pleć. Muški na glavu nosi beritu. To je vrićasta pletena kapa koj zaprti del bude vežen zi špažićen ki na kraj ima cufić. Š nju se lipo moru pokrit i uši. Mi nosimo široke brageše, u pas stišnjene oko tela. Jako su dumboke i široke na bok, a nogavice finjuju na usko, malo zgor kičice. Skoro pedanj širok i jedan paš dug pas prekriva o pasu dolinji del koreta i gorinji del brageš, i vežuje se na uzal. Mladići vežu uzal na desni, a muži na livi bok i to je jedini sinjal po komu jih se dije more poznat. U muško obukilo naših dedi je pripadal i kafeni kabanić. On je jimil i kapuč tako da ga se nosilo za dažja. Na noge su jimili obujene bele kalcete i postoli na tak. U muško obukilo naših dedi su pripadale i maja od vune za na kožu i duge butande, istešo od vune. ___________________________________________________________________________
ISTEŠO – isto tako, BRAGEŠE – hlače, UZAL – čvor, KOMUDAN – udoban, DRMUN – šuma, UŽANCA – običaj
KAMIŽOT – suknja, KAFENO – smeđe, ZGOR – iznad, PARANKE – naramenice , MEKOTA – pašnjak, KOLUR – boja,
Divojaštvo je cvet ljudskoga života, a materinstvo slatki plod toga istoga življenja. Rožica se od ploda razlikuje, tako se po nošnji razlikuje i divojka od žene. Divojka nosi belu košuju zi dugi i široki, na ponši nabrani rukavi. Okolo vrata i na prsa jima široki rakamani kolet. Divojačka košuja je duga do na bedra i mora bit komudna. Spod košuje se na prsa nosila slipica ka se u današnje vrime deboto više i ne dupera. To je na fijuželice okolo vrata vežena pačetvorenasta koltrinica ka čuva prsa od mrzline, sunca i pohotnoga oka. Slipica je zato aš slipi (falsari) celi del obukila. Pod kolet pleća čuva svilni facol kafenkastoga, črjenoga al žutoga kolura. Složen je poprik na tri kantuni. Pod rakam od košuje facol pada do pod pas i ćapan je zi puntapeton za rakam košuje. Divojka nosi črni kamižot ki visi na paranke priko ramena. Kamižot je o pasu uz telo, a doli je širok i napijetan. Rub kamižota jima črjenu traku, a zgor te trake je žuta kordela, i obe gredu sve naokolo kamižota. Od zdola na gori gredu dvi kordele, zelena i modra, pa onda gre jedan šik. Šik je otkana uska zlatnožuta al slebrena kordela. Zgor toga šika gre kordela črjenoga kolura, pak onda opet šik, i onda pri vrhu još dvi kordele, svaka svoga kolura. Zelena kordela je za drmuni i mekote, modra za more, a črjena za našu črjeno zorenu zemju. Tako nakićen kamižot je prava lipota za oko! Divojka na kamižot sprida veže traversu ka je škuromodroga ali črnoga kolura i na rožice. O pasu divojka ima pas od šika ki se zakučuje na šuštine al kučice. Pod kamižot divojka jima na samo telo uski fric, i na njega dva širi frica. Frici su na dno rakamani i štikani da jih je lipo vidit kad se divojka u tanac obraća. Na noge divojke nose črjene kalcete i postoli na basi taki. Divojka će se nakitit zi kolajnicu i medaljicu al zi kolaron od peružin al biserčići. Bogatije nose kordun i na njega veliki križ. Već od jedna nosi i vridan puntapet, a na uši roćine. To su najveć puti morčići, a ka more na njih veže i tombulčići. Ako je divojka očitovana, na prst nosi i mladićev prsten. ______________________________________________________________________________________________________________________________________________________ VERAS – stih, KIČICA – gležanj, FIJUŽELA – vez, FRIC – podsuknja, FACOL – marama, NAPIJETANO – nabrano, DEBOTO – skoro, KALCETE – čarape
SLIPIT – varat, ŠTIKANO – vezeno, RAKAM – čipka, PAČETVORINA – pravokutnik, PONŠ – manžeta, BUTANDE – gaće, OPAS – struk, BASO – nisko, ŠIK – ukrasna traka, ŠUŠTINA – kopča od dva dijela
Skupa napisali, da se nikad ne zatare : Danijel (Deni) Šabalja – Guštin i Anton (Tončić) Bogović – Jurov