Nošnja žene je diferenta od divojačke nošnje po tomu ča žena na košuju nosi šurku zi na ramena nabrani rukavi. Facol na pleća je škurijega kolura, ma nikad črn. Kamižot žene je manje napijetan od divojačkoga, nima črjeni dolinji rub i nakićen je samo zi dva šika, zlatnin i slebrnin. Traversa je žutoga, slebrnastoga al kafenoga kolura, i jima šiki ki se poklapaju zi šiki na kamižot. Šoto kamižota žene nose po jedan uski i jedan široki fric. Žena nosi črne kalcete i postoli na basi taki. Pristoji njoj se i da se zakiti zi zlaton kako i divojka, ma ona na prst nosi i prsten od očitovanja i vericu od ženidbe. O pasu su nike ženske nosile i kanicu (tkanicu). To je lipi šari pas ki se je vezal z uzlon priko traverse na bok. Nošnji žene pripadalo bi i pokrivalo za glavu ko zovemo rub. To je pednjić širok i paš dug šijalić ki se ovije okolo glave i dupera se samo za fešte. Fanj je šepetan za ga šaldat na glavu i nosit, pak se zapušća. Sagdanji dan su žene nosile košuju, šurku i kamižot bez šiki i kordel, a glavu su pokrivale zi platnenin facolon složenin na tri kantuni, veženin pod kose po letu, a pod bradu po zimi. Danaska žene i divojke nose kraći vlasi pak jih, kad su u nošnju dignu ili spletu u pletenice i stave rožicu na desnu bandu glave. U Kolejani od kih imamo letrati, muški su najveć nosili belu košuju zi škuru šjarpu, škuri veštid i blagdanji postoli. Mladići su bili gologlavi, a muži su nosili škuri klobuk zi ne široke krela. Da se ne zatare užanca, i u ovi Kolejani će veći del muških bit tako obučeni.
_________________________________________________________________________________________________________________________________
PEDANJ – mjera dužine, PAŠ – mjera dužine, PERUŽINE – staklene ukrasne kuglice, MORČIĆI – autohtone zltane naušnice,
BUMBAK – pamuk KOLAJNICA – lančić, ŠURKA – bluza, KORDELA – traka, PUNTAPET – broš, DUPERA – upotrebljava,
KORDUN – zlatni lanac, KUČAN – kopča, spona KOLET – ovratnik, ROĆINE – naušnice, OČITOVANA – zaručena,TRAVERSA – pregača
