U Dubašnicu Bogovićeva fameja kih zovemo Bogovci, jima posebojnu, jednu i jedinu nošnju u ku je kamižot od črjenoga tkanja pa je zato zovemo „črjenica“. Bogovci su rekli da su je dobili sprid 250 let i čuvaju ju kako svetinju svoju, i svih nas, a dupera se jušto za blagoslov crikve i kolejanski piri. Mi danaska svih judi ki su nosili brageše, zovemo bragešari. Kuliko smo uspili doznat, zadnji bragešar u Dubašnicu bil je Jive Turčić od fameje Jurovci. Njegov nan je vnuk rekal da je on nosil i roćinicu ka će se kašnje vrnut u nikih muških i bit deboto sablazan. E, sve se tornjuje… Ta Jive Jurovac je umrl pedesetih let pasanoga vika i od ondat nijednomu Dubašljanu brageše nisu svakodnevno obukilo. Pamćenje gana da su pud kraj dvajsetoga vika umrle nike žene ke su za svoje obukilo nosile kamižot na botun. Ne bimo mogli za šiguro napisat ka je bila zadnja, a falit se ne bi otilo. Još i jedna štorija o toj našoj muškoj nošnji. Ona je bez nikakovoga kićenja i lipa je aš je jednostavna. Brageše su široke da ne spućuju čovika, a i kopin je komudan, zato se od onih zi gorinjega kraja i danas more čut na naš račun rečeno malo podsmihjivo reko: – Bodulo fić, široke brageše, mića rit! A mi ćemo reć: – Mi smo Boduli! I smo!
